Македонската ракометарка Сара Миновска би можела да ја продолжи кариерата надвор од границите на Македонија. Според информациите на Спортска Димензија, за левото крило постои сериозен интерес од неколку странски клубови, а најреална опција во моментов е преселба во Словачка, каде што би го реализирала својот прв интернационален трансфер.
Миновска важи за брза и борбена ракометарка, која успешно ги извршува задачите и во напад и во одбрана, што ја прави значајно засилување за секој тим.
Вториот дел од минатата сезона го мина во редовите на Чаир, каде што пристигна од Металург Автокоманда. Претходно настапуваше и за Вардар, клуб во кој беше препознаена како една од најперспективните македонски ракометарки на позицијата лево крило.
На репрезентативен план Миновска има настапи за младинската и сениорската селекција на Македонија. Еден од нејзините најголеми успеси беше настапот на ЕХФ шампионатот во Скопје во 2021 година, кога беше избрана за најдобро лево крило на турнирот, признание кое уште тогаш го потврди нејзиниот голем потенцијал.
Доколку најавите се реализираат, трансферот во Словачка ќе биде првиот интернационален предизвик во кариерата на Сара Миновска и нов чекор во нејзиниот развој на меѓународната сцена. Според информациите на Спортска Димензија, конечната одлука околу нејзината иднина се очекува во наредниот период.
