Започнаа земјените работи и ископот за темелите на новиот објект кој ќе биде дел од Спортскиот центар „Јасмин“ во Кавадарци, капитален проект со кој градот ќе добие нови современи спортски содржини и услови за развој на спортот.
Според информациите што ги објави градоначалникот на Општина Кавадарци, Митко Јанчев, во следната фаза од реализацијата ќе следува изведба на темелите и нивно тампонирање, со што проектот постепено ќе започне да ја добива својата конечна форма на терен.
Новата инвестиција ќе се простира на површина од 1.000 метри квадратни во основа, а објектот ќе располага со подрум, приземје и кат. Во рамки на комплексот предвидени се куглана, сала за гимнастика, како и седум апартмани за сместување на спортисти.
Проектот е со вкупна вредност од 118.000.000 денари и целосно е финансиран преку Владата, односно преку вториот повик за капитални инвестиции.
Со оваа нова спортска инвестиција, Кавадарци продолжува да се развива како модерен и спортски ориентиран град, кој создава подобри услови за спортистите, младите и спортските клубови.
