ФК Вардар не ја започна најдобро новата сезона, во која амбициите на клубот се освојување на трофеите, но по промените на тренерската позиција, шампионот продолжува да работи на исполнување на зацртаните цели.
Новиот тренер Миодраг Божовиќ во изминатиот период имаше нешто повеќе време за работа со екипата, запознавање со фудбалерите и наметнување на своите идеи и принципи на игра. Сега останува играчите да го пренесат тоа на теренот и да покажат напредок во следните натпревари.
Првиот предизвик за вардарци е денешното гостување кај ФК Скопје, на стадионот „Железарница“. Црвено-црните се свесни за важноста на овој дуел и не кријат дека во Скопје одат со јасна цел – освојување на трите бода.
„Одиме по три бода“, порачуваат од таборот на Вардар, кој ќе мора да биде максимално фокусиран и внимателен во текот на сите 90 минути. Шампионот ќе треба да избегне грешки какви што му се случуваа на претходните гостувања, меѓу кои и она во Куманово, и да ја оправда улогата на фаворит.
Квалитетот и амбициите се на страната на Вардар, но тоа ќе треба да биде потврдено и на теренот. За Божовиќ и неговите избраници, денешниот натпревар претставува можност за освојување важни бодови и најавување подобри резултати во продолжението од сезоната.
Натпреварот меѓу Скопје и Вардар е закажан за денеска од 15 часот на стадионот „Железарница“, а главен судија ќе биде Фуркан Идризи.
