Екипата на Башкими, по првите три кола во новата фудбалска сезона, сè уште е без освоен бод и без постигнат гол. Сепак, она што ги охрабрува раководството и стручниот штаб на кумановскиот клуб е далеку подоброто издание на последниот натпревар против Арсими во Гостивар, каде што и покрај поразот, играта беше на ниво, а недостасуваше само реализацијата.
Оптимизмот во таборот на Башкими се базира и на традицијата, со оглед на тоа што клубот верува во добар исход од дуелите со Брегалница.
„Натпреварите против Брегалница низ годините ни лежеа и често знаевме да се вратиме со позитивен резултат од нивниот терен. Се надеваме дека така ќе биде и овој пат“, истакна фудбалерот Мал Јонузи.
Тој верува дека кумановци ќе се прикажат во право светло на претстојниот дуел во Штип, кој ќе се игра во вечерен термин.
„Нè очекува убав натпревар под рефлектори, одлична можност за публика да ужива во фудбалот, а ние да ги израдуваме нашите навивачи“, додаде Јонузи.
Натпреварот меѓу Брегалница и Башкими ќе се одигра на градскиот стадион во Штип, со почеток од 19:00 часот, а главен судија на мечот ќе биде Доне Ристовски.
