Жителите на Општина Сопиште од денеска имаат современ и функционален спортски простор, откако беше пуштено во употреба реконструираното мултифункционално игралиште, реализирано со поддршка на Министерството за спорт и Владата, во соработка со Општина Сопиште.
Новиот спортски простор, кој се наоѓа наспроти општинската зграда, денеска официјално го пуштија во употреба министерот за спорт Борко Ристовски и градоначалникот на Општина Сопиште, Јане Мицевски.
Игралиштето располага со терени за фудбал, ракомет и кошарка, современа спортска опрема, трибина и заштитна ограда, со што на децата, младите и сите граѓани им се обезбедуваат подобри услови за спортување и рекреација.
Ристовски истакна дека вложувањето во спортската инфраструктура останува еден од приоритетите на Министерството за спорт, со цел современите услови за спорт да бидат достапни во сите општини.
„Секое ново игралиште значи нова можност едно дете да го избере спортот, наместо пасивноста. Значи нов простор за младите каде може да спортуваат и правилно да се развиваат. Без основни услови не може да зборуваме ни за професионален спорт, ниту пак за правилен развој на младите кои овде ги прават првите чекори во спортот“, порача Ристовски.
Министерот додаде дека Министерството за спорт, со поддршка од Владата, продолжува со реализација на проекти за изградба, реконструкција и унапредување на спортската инфраструктура низ државата.
„Ова е насоката во која одиме. Не ветувања, туку реализирани проекти. Не само зборови, туку работа на терен“, истакна Ристовски.
