Вардар го очекува нов европски предизвик во Лигата на шампионите, а на 8 октомври во „Јане Сандански“ гостува Висла Плок. Полскиот вицешампион во Скопје ќе се соочи не само со силниот вардаров состав, туку и со атмосферата која традиционално го краси домот на „црвено-црните“.
Токму на атмосферата во „Јане Сандански“, во ексклузивен разговор за Спортска Мрежа, се осврна ракометарот на Висла Плок- шпанскиот дефанзивец Ориол Реј Моралес, кој добро ја познава вардаровата публика и амбиентот во салата. Тој посочи дека сите во тимот на Висла знаат што ги очекува во Скопје, без разлика дали тоа го почувствувале на своја кожа или го виделе во најголемите моменти на Вардар.
„Сите играчи во нашиот тим знаат каква е атмосферата во „Јане Сандански“, бидејќи или сме играле таму, или сме ја гледале во најголемите моменти на Вардар. Знаеме дека освојувањето на два бода таму е многу тешка задача и само ако бидеме целосно фокусирани на натпреварот и не дозволиме публиката да ни го одвлече вниманието, ќе го најдеме патот до таа цел“- вели Моралес за Спортска Мрежа.
Така, Висла Плок ќе има исклучително тежок испит во Скопје, каде Вардар ќе ја има поддршката од својата публика. За гостите, концентрацијата и способноста да го задржат фокусот во текот на сите 60 минути ќе бидат клучни доколку сакаат да стигнат до бодовите од „Јане Сандански“.
