Женскиот ракометен клуб Овче Поле Славјански Универзитет од Свети Николе ги започна подготовките за новата сезона во Првата лига, со јасно поставена цел – пласман во Супер лигата.
Ракометарките од Свети Николе главната фаза од подготовките ќе ја одработат во Претор, Ресен, каде што од клубот велат дека имаат одлични услови за работа. Во овој период акцентот е ставен пред сè на општата физичка подготовка, по што тимот ќе продолжи со тактичко-техничкиот дел од подготовките и контролните натпревари.
Овче Поле СУ во новата сезона влегува со сериозни амбиции. Минатата сезона тимот беше многу блиску до обезбедување на второто место и пласман во баражот за Супер лигата, па сега раководството прави дополнителни напори за да се направи состав кој ќе може да го направи последниот чекор кон елитното друштво.
Составот претрпе одредени промени, но клубот успеа да ги задржи и продолжи соработките со неколку важни ракометарки. Нови договори потпишаа Јована Ангеловска, Јована Конева, Јана Ристовска и Викторија Димчева, додека продолжена е соработката и со младата голманка Стефани Ѓоргиева.
Ѓоргиева минатата сезона беше дел од кадетската екипа, а во новата сезона ќе биде приклучена кон сениорскиот состав и ќе го формира голманското трио заедно со Дона Маркоска и Ивана Станчева.
Светиниколскиот состав доби и неколку нови имиња. Од кадетската екипа на Вардар пристигнува Натали Маџовска, родена 2008 година, која игра на позицијата лев бек. Ново име е и Андонела Ангелковиќ, родена 2013 година, која настапува на позицијата десно крило, а во Овче Поле СУ доаѓа од пионерската екипа на Спартак.
Дополнителни засилувања се и Михаела Николовска, која игра на позицијата кружен напаѓач и пристигнува од Куманово, како и Стефанија Павловска, која ќе биде опција на позицијата лево крило.
Со комбинација на искусни ракометарки и млади таленти, Овче Поле СУ гради состав кој треба да биде конкурентен во битката за врвот на Првата лига.
Целта е јасна – по минатогодишниот чекор до баражот, оваа сезона Свети Николе сака да направи чекор повеќе и да обезбеди место во Супер лигата.
