Македонскиот футсал шампион Проект од Јосифово продолжува со подготовките за новата сезона, а во рамките на истите ќе одигра пријателски двомеч против шампионот на Бугарија, Амиго Нортвест.
За составот на Проект ова ќе биде одлична можност за два квалитетни теста и дополнително воигрување пред големиот европски предизвик – настапот во прелиминарната рунда од УЕФА Футсал Лигата на шампионите.
Првиот натпревар е закажан за утре (сабота) од 18:00 часот, додека вториот ќе се одигра во недела од 13:00 часот. Двата меча ќе се играат во спортската сала „Парк“ во Струмица.
Натпреварите ќе бидат од затворен тип и без присуство на публика.
По овие контролни средби, вниманието на Проект ќе биде насочено кон европската сцена. Македонскиот шампион во прелиминарната рунда од Лигата на шампионите ќе биде дел од групата во која се и Врхника, шампионот на Словенија, Атлетик Грац, шампионот на Австрија, како и Макаби, шампионот на Израел.
Турнирот од оваа група ќе се одигра во Грац, Австрија, од 25 до 30 август, каде Проект ќе се обиде да обезбеди пласман во следната фаза од европското натпреварување.
