Еурофарм Пелистер со убедлива победа ги започна контролните натпревари во рамки на подготовките за новата сезона. Битолчани славеа со 36-24 против репрезентацијата на Катар, во натпревар кој донесе и интересен тренерски дуел.
Избраниците на Лино Червар уште од самиот почеток го презедоа контролата врз играта и на полувремето имаа шест гола предност – 18-12. Во вториот дел битолскиот тим продолжи во ист ритам, постепено ја зголемуваше разликата и на крајот стигна до убедлив триумф од 12 гола.
За Червар ова беше деби на клупата на Еурофарм Пелистер, а на спротивната страна беше неговиот добро познат ривал Веселин Вујовиќ, кој ја предводи репрезентацијата на Катар.
Средбата беше своевидно потсетување на големите тренерски пресметки од периодот кога Червар и Вујовиќ ги предводеа Металург и Вардар, со кои создадоа едно од најголемите ривалства во македонскиот ракомет.
За Еурофарм Пелистер ова е добра најава на подготовките, а битолчани продолжуваат со тестирањето на формата и воигрувањето на тимот.
Следниот контролен натпревар ќе го одиграат против словенечка Крка.
