Еурофарм Пелистер ќе биде македонскиот претставник во групната фаза од Лигата на Европа во новата сезона, додека ГРК Охрид ќе ги продолжи настапите во ЕХФ Европскиот Куп.
Битолскиот тим ќе биде сместен во првиот шешир пред ждрепката за групите, која е закажана за 17 јули. Првите натпревари во второто по ранг европско клупско натпреварување ќе се играат на 29 и 30 септември.
Местото во Лигата на Европа му припадна на Еурофарм Пелистер откако Вардар доби место во Лигата на шампионите. Со тоа, битолчани ја преземаа квотата што според ранкингот беше наменета за македонскиот шампион, додека Европската ракометна федерација не го прифати барањето на Охрид за настап во ова натпреварување.
Во групната фаза од Лигата на Европа, двете најдобро пласирани екипи од секоја група ќе обезбедат директен пласман во нокаут-рундата, каде ќе им се приклучат и третопласираните и четвртопласираните состави од групите во Лигата на шампионите.
