Охрид ќе ја започне одбраната на трофејот во ЕХФ Европскиот Куп од второто квалификациско коло, а противникот ќе го дознае по ждрепката, кога ќе биде јасно кој ќе му се најде на патот меѓу победниците од првата рунда и екипите што директно се пласирани во второто коло, но не се носители.
Како актуелен освојувач на трофејот, македонскиот претставник ќе има статус на прв носител на ранг-листата за новата сезона, што значи дека до осминафиналето ќе биде сместен во првиот шешир на ждрепките.
Меѓу потенцијалните противници на „гладијаторите“ се Ислингтон од Англија, Слога Добој од Босна и Херцеговина, АЕК Атина од Грција, Нербо од Норвешка, Динамо Панчево од Србија, Кремс од Австрија, Бурса од Турција, како и словачкиот Бојнице.
И покрај амбициите за настап во Лигата на Европа, Европската ракометна федерација не го прифати барањето на Охрид за вајлд-карта. Така, охридскиот состав и во сезоната што следува ќе биде дел од ЕХФ Европскиот Куп, натпреварување во кое минатата сезона ја испиша најголемата страница во клупската историја со освојувањето на трофејот.
Одлуката на ЕХФ сигурно нема да ги промени амбициите на охриѓани, кои ќе имаат можност повторно да се докажуваат на европската сцена и да покажат дека минатогодишниот успех не беше случаен.
