Тажна вест го потресе тетовскиот и македонскиот фудбал. На само 21 година трагично почина Даниел Николовски, млад фудбалер кој својот живот го посвети на најважната споредна работа на светот.
Николовски го загуби животот во сообраќајна несреќа што се случила во текот на изминатата ноќ. Според достапните информации, несреќата се случила на патниот правец од клучката за Маврово кон Гостивар. Од неговиот матичен клуб Тетекс утрово ја потврдија трагичната вест, упатувајќи сочувство до семејството, пријателите и сите блиски на младиот фудбалер.
Николовски беше фудбалер кој потекнуваше од школата на Тетекс. Таму ги направи првите чекори, а со своите настапи стигна и до сениорскиот состав на „текстилците“. Во Втората македонска фудбалска лига запиша 38 настапи и постигна пет голови.
Особено впечатлив период во неговиот развој беше пролетниот дел од сезоната 2021/22, кога во младинската конкуренција на Тетекс блесна со неверојатна голгетерска серија и постигна дури 32 погодоци.
Младиот тетовец во текот на кариерата имаше можност да се обиде и надвор од Македонија. Беше дел од германскиот нисколигаш Релинген Фремерсдорф, а потоа го носеше и дресот на хрватскиот Хрватски Витез од Поседарје, кој настапува во третото ниво на хрватскиот фудбал.
Во летниот период Николовски требаше да биде ново засилување и за амбициозната Дрита од Боговиње. Сепак, трагичниот настан го спречи да го направи следниот чекор и да продолжи да го гради својот фудбалски пат.
Зад него остануваат спомените од неговите фудбалски почетоци, головите, настапите и времето поминато на теренот. Пред него требаше да има уште многу години, натпревари и можности.
Но, наместо фудбалските терени, денес македонскиот фудбал се збогува со еден млад живот.
