Охрид убедливо го доби Езерското дерби, откако „гладијаторите“ со сигурна и доминантна игра славеа над Струга со 33-16. Избраниците на Борис Ројевиќ уште од самиот почеток го контролираа натпреварот, а со одличната игра во двата правци не ѝ дозволија на Струга да се врати во мечот.
Посебно впечатлив беше амбиентот во „Билјанини Извори“, каде што трибините беа исполнети, а поддршка за своите екипи дадоа и двете навивачки групи. За значењето на атмосферата и чувството да се игра пред полни трибини, за Спортска Мрежа говореше и Мартин Ивановски, од таборот на Охрид, кој го истакна значењето на поддршката од публиката.
„Искрено, секогаш кога играат овие две екипи – и во минатото и сега, а и допрва ќе биде исто – атмосферата ќе биде жешка. Беше навистина убаво чувството да се игра пред толку публика, и пред двете навивачки групи. Благодарност до нив што дојдоа, и што ги поддржуваа своите фаворити.“- изјави Ивановски за Спортска Мрежа.
Охрид во текот на целиот натпревар делуваше како поквалитетен и посигурен противник, што на крајот резултираше со убедлива разлика од 17 голови. Ивановски смета дека тимот бил добро подготвен за дуелот, а покрај квалитетот на составот, како важен фактор ја посочи и предноста на домашниот терен, дополнета со силната поддршка од трибините.
„Мислам дека ние добро бевме подготвени за овој натпревар, а сметам дека сме поквалитетни од Струга, и тоа го покажавме и на теренот. Бевме фаворити, а и домашниот терен ни даде мала предност тука. Сепак, мислам дека и оваа публика ни даде исто така ветер во грб, иако мислам дека главно е тоа што квалитетот е на наша страна и ние не дозволивме во ниеден момент Струга да се посомнева дека има некакви шанси на овој меч.”- заврши Ивановски.
Со убедливото издание против Струга, Охрид ја запиша првата победа во новата сезона од Суперлигата и на најдобар можен начин го одбележа Езерското дерби. „Гладијаторите“ сега го насочуваат вниманието кон следниот предизвик и гостувањето кај Бутел во Скопје.
