Сè е подготвено во Богданци за првиот домашен натпревар на РК Младост во новата сезона од Суперлигата. Повратникот во македонското ракометно елитно друштво вечерва ќе ја пречека екипата на Прилеп, во натпревар кој со посебно внимание се очекува од љубителите на ракометот во градот.
Салата “Млаз” доби и нов изглед, по серијата реконструктивни активности со кои спортската сала беше значително унапредена.
Како што Спортска Мрежа веќе известуваше, комплетно беа санирани и реновирани соблекувалните, обновен беше подот, а се работеше и на надворешниот изглед на салата, како и на нејзините внатрешни делови.
Но, новитетите не завршуваат само со инфраструктурните зафати.
Сите оние кои вечерва ќе бидат дел од првиот суперлигашки натпревар на Младост ќе влезат преку главниот влез, каде што ќе биде достапно и бифе со точени пијалоци, па посетителите ќе можат да се освежат пред и за време на натпреварот.
Посебно место во салата има и галеријата посветена на историјата на Младост. Таму се изложени најголемите успеси на клубот – пехари, медали и освоени титули, но и бројни фотографии, весници, списанија, книги и други материјали кои сведочат за богатото минато на богданечкиот ракомет.
Галеријата не ја раскажува само приказната за РК Младост, туку и за женскиот ракометен клуб Млаз, со што на едно место е зачувана значајна дел од ракометната историја на Богданци.
По враќањето во Суперлигата, Младост вечерва ќе го има првиот вистински тест пред своите навивачи, а атмосферата во целосно обновениот ракометен дом се очекува да биде посебна.
Натпреварот Младост – Прилеп започнува во 19:30 часот, а сите кои нема да можат да бидат во салата во Богданци ќе имаат можност да го следат натпреварот во живо на YouTube каналот на Ракометната федерација на Македонија.
За Младост ова не е само почеток на нова суперлигашка сезона. Тоа е и враќање на клубот во елитата во сала која повторно го добива препознатливиот ракометен дух и во која историјата и иднината на ракомет на малото гратче од Југот ќе бидат на едно место.
