Кошаркарската федерација на Македонија одржа работен состанок со претставниците на клубовите – членки на Здружението на клубови од Женската Прва лига. На состанокот беа разгледани повеќе прашања поврзани со организацијата и подготовките за новата натпреварувачка сезона 2026/2027.
Средбата се одржа во просториите на КФМ, а главен фокус беа темите поврзани со непречен почеток и реализација на натпреварувањето во новата сезона.
Меѓу останатото, се разговараше за системот на натпреварување, календарот и термините за старт на сезоната, како и за организациските аспекти поврзани со текот на натпреварите.
Во сезоната 2026/2027 во Женската Прва лига ќе настапуваат осум екипи, кои ќе се натпреваруваат за што подобар пласман и резултат во текот на сезоната.
Работниот состанок овозможи претставниците на клубовите и федерацијата да ги споделат своите предлози, мислења и ставови во однос на претстојната сезона. Сите разгледани прашања и предлози ќе бидат земени предвид од страна на надлежните органи на КФМ во понатамошните активности.
Во рамките на работниот состанок беше реализирана и ждрепката на натпреварувачките броеви,со која беа формирани двојките за првото коло од новата сезона во Женската Прва лига, кое е предвидено да се одигра на 10/11 октомври 2026 година:
- Вардар – Крива Паланка
- Пробаскет – Бадел 1862
- Гевгелија – Патриот
- МЗТ Бела Вода – Баскет Кам
