Петтото коло од Втората македонска фудбалска лига носи натпревар под рефлектори. Во Струмица, со почеток од 19:00 часот, ќе се соочат екипите на Беласица и Тетекс.
Струмичани ја имаат улогата на фаворити на овој натпревар, а тимот предводен од Мартин Алаѓозовски ќе бара триумф со кој би се вратил на победничките патеки по двете последователни ремија.
„Штофарите“, пак, во Струмица ќе се обидат да стигнат до позитивен резултат и да го заборават поразот од претходното коло, кога на домашен терен загубија со 0:3 од Охрид.
Главен судија на натпреварот во Струмица ќе биде Крумислав Ѓоргиев, негови асистенти ќе бидат Богданчо Ѓеоргиев и Дејан Стоиков, додека Дарко Стојанов е назначен за четврти судија.
Делегат на средбата ќе биде Трајче Шопов, а контролор на судењето ќе биде Горан Ангелески.
