Новата сезона во Трета лига – Регион 4 стартуваше со четири натпревари кои беа одиграни вчера, а на кои беа постигнати фантастични 25 погодоци.
Трибината на стадионот „Гоце Делчев“ беше исполнета со публика, се врати тој сјај од минатото на трибините, а ГФК Победа со убедливи 6:0 го декласираше Превалец.
Даниел Карчески постигна хет-трик за Победа, а по еден гол постигнаа Мартин Никовиќ, Иса Цанески и Марио Наумоски.
Тежок пораз претрпе ланскиот второлигаш Вардар Неготино, продолжи серијата на лоши резултати од минатата сезона. Во рамките на првото коло тимот од Неготино беше декласиран од Бучин во гости со резултат од 6:3.
Христијан Маркоски беше двоен стрелец за домаќинот, а по еден гол постигнаа Сашо Талевски, Бојан Мицески, Стефан Бончаноски и Антонио Солевски, додека пак за тимот од Неготино стрелци беа Борис Ристов, Оливер Тодоров и Стојанче Камчев.
Голема радост и за новајлијата Победа од Пепелиште, која на домашен терен со 3:0 го совлада Поти Гули од Крушево.
Денис Мемков го отвори резултатот за водство на домаќинот во 18. минута, а со 1:0 Победа замина на полувреме. Во вториот дел Мартин Младеновиќ погоди за двојна предност во 51. минута, а две минути подоцна Мемков со втор гол ги постави конечните 3:0.
Во Долни Дисан беа постигнати седум погодоци за убедлива победа на Венец од 6:1 над Ултрас. Победата беше најавена уште во првиот дел кога домаќинот имаш два гола предност преку Дарио Спиров и Јован Лембовски.
Во второто полувреме Петар Ристовски погоди за 3:0, по што во 65. минута гостинот намали на 3:1 преку гол на Славчо Стојчевски.
Сепак, мрежата на гостинот продолжи да се тресе, откако Ѓорѓи Шишков со два погодоци и Кирил Неделков со еден гол ги поставија конечните 6:1.
Колото ќе биде комплетирано денес.
