Македонска машка кошаркарска репрезентација ја потврди доминацијата во првата рунда од претквалификациите за Евробаскет 2029, откако со победа од 80:66 на гостувањето кај Луксембург го заокружи настапот со максимален учинок од шест победи во шест натпревари.
Иако селекторот Жозеп Марија Берокал не можеше да смета на неколку стандардни кошаркари и му даде одмор на капитенот Војдан Стојановски, македонскиот состав уште од стартот ја презеде иницијативата. По воведните десет минути водеше со 23:15, а до полувремето создаде убедлива предност од 46:27, која без поголеми проблеми ја задржа до самиот крај.
Одличен прв настап во националниот тим имаше Нејт Сестина, кој беше најефикасен со 18 поени и пет скока. Значаен придонес даде и Ташовски со 16 поени, седум скока и седум асистенции, додека Ѓуроски запиша 13 поени. Ефремовски и Какруки натпреварот го завршија со по 12 поени.
Со скор 6-0 и освоени 12 бодови, Македонија убедливо заврши на првото место во групата „А“, оставајќи ги зад себе Луксембург, Ирска и Азербејџан. „Црвено-жолтите“ на одличен начин го затворија јулскиот ФИБА прозорец и со голема самодоверба ќе влезат во втората рунда од претквалификациите, која започнува на 27 август.
