Во единаесет дена македонската фудбалска репрезентација игра четири меча, утре во Луцерн ќе играме против Швајцарија, во обид за први бодови во новото издание на Лигата на нации, за крај на резултатската криза, но и шанса за гол после долг период.
Висар Муслиу на прес-конференцијата пред утрешниот меч истакна дека Швајцарија не е само офанзивно силна репрезентација, дека имаат квалитет од голманот до шпицот.
„Швајцарија не е само офанзивно силна репрезентација, имаат квалитет од голман до шпиц. Не може да говориме само за одбрана, затоа што ќе ни биде потребна тимска игра од напаѓач па до голман. Сите мора да учествуваме дефанзивно ако сакаме да бидеме успешни“, вели Муслиу.
Дефанзивецот истакна дека нашата репрезентација е во тешка ситуација, дополнувајќи дека мора сите да стават прст на глава.
„Се наоѓаме во тешка ситуација, нема резултати, а сите ги очекуваа затоа што го навикнавме народот со добрите резултати. Мора да ставиме прст на глава, да видиме што правиме и како се однесуваме кон дресот. Лигата Б е поквалитетна и тимски и индивидуално, но мора нешто да покажеме. Не смее само противникот да се прашува.“
Висар Муслиу истакна дека поддршката е најмногу потребна во овие моменти.
„Ние сме луѓе, имаме емоции. Кога оди добро, никој ништо не кажува, но кога има толку навреди кон некого, не е убаво. Сега ни е најмногу потребна поддршката. Не е исто за нас што немаме победа и гол, но мора да гледаме напред. Чекаме поддршка на секој меч и сакаме секој да верува во нас. Како што имавме добри резултати порано, можеме и на наредните натпревари да бидеме подобри.“
Дуелот меѓу Швајцарија и Македонија стартува утре во 20:45 часот.
