Охрид е пред уште една историска вечер – европско полуфинале кое носи огромна тежина, но и шанса за подвиг што долго ќе се памети. Во сабота, пред преполните трибини во „Билјанини извори“, ракометарите на ГРК Охрид ќе излезат со една цел – да го дадат максимумот и да направат чекор поблиску до финалето во ЕХФ Европскиот Куп.
Еден од клучните адути во тимот, Томислав Јагуриноски, јасно ја потенцира важноста на овој натпревар, истакнувајќи дека иако противникот има сериозен квалитет, домашниот терен ќе биде силен фактор за Охрид.
„Ова европско полуфинале има големо значење за Охрид! Целје има одличен тим, но ние играме на домашен терен и ќе го дадеме нашиот максимум!“- изјави Јагуриноски.
Поддршката од трибините, мотивацијата и желбата за успех се на страната на охриѓани, кои ќе се обидат да испишат нова страница во клупската историја. Сè е подготвено за ракометен спектакл – останува тимот да одговори на предизвикот на теренот. Натпреварот се игра во сабота (02.05), со почеток од 19:00 часот.
