Машката кадетска репрезентација на Македонија предводена од селекторот Горан Кузманоски, стигна до голем успех и го освои златниот медал на Светското првенство во училишен ракомет, по победата во финалето против Израел со 38-32.
Македонските ракометари од самиот старт ја контролираа играта и резултатот, не дозволувајќи противникот сериозно да се закани. Уште по првото полувреме ја најавија победата, кога заминаа на пауза со предност од 20-14.
Во вториот дел Израел кратко се врати резултатски и намали на само два гола разлика, но тоа беше максимумот што го дозволија нашите млади надежи. Во клучните моменти повторно ја подигнаа играта и рутински го приведоа натпреварот кон крај.
Дополнителен предизвик во финишот беше и исклучувањето на кружниот напаѓач Вујичевски, кој доби црвен картон на осум минути до крајот, но и тоа не ја наруши стабилноста на македонскиот тим.
Покрај машкиот успех, и женската кадетска репрезентација имаше свој настап во финалето, каде по голема борба беше поразена од Хрватска со 28-26 и се закити со сребрен медал.
Со ова, Македонија уште еднаш покажа дека има силна ракометна иднина и генерации што доаѓаат со голем потенцијал.
