Вардар освои големи три бода на гостувањето кај Скопје во Автокоманда, славејќи со 1:2 благодарение на двата погодоци на Горан Закариќ. Напаѓачот на „црвено-црните“ беше херој на својот тим, откако со гол во судиското надополнување му донесе цел плен на Вардар.
Домашниот состав, популарните „Пирати“, подобро го отвори натпреварот и во 26. минута стигна до водство. Виктор Ангелов ја затресе мрежата на гостите за 1:0, резултат со кој Скопје замина на паузата со предност.
Сепак, Вардар не се предаде и во второто полувреме успеа да го промени текот на натпреварот. Во 56. минута, Горан Закариќ се запиша во листата на стрелците и го израмни резултатот на 1:1, најавувајќи неизвесна завршница.
Кога се чинеше дека двата тима ќе мора да се задоволат со по еден бод, Закариќ повторно стапи на сцена. Во судиското надополнување постигна уште еден гол и му донесе драматична победа на Вардар од 1:2.
Триумфот има дополнителна тежина за вардарци, кои го искористија ремито на лидерот Шкендија од Тетово против Шкендија Арачиново (1:1) и продолжуваат да го притискаат врвот на табелата во Првата македонска фудбалска лига.
Од друга страна, дебито на Иван Варадиновски на клупата на Скопје заврши со пораз. Штипскиот стратег ќе мора брзо да најде решение за резултатската криза на тимот од Автокоманда, кој и понатаму ја бара првата сезонска победа.
