Охрид триумфираше во дербито против Алкалоид со 26:24, во меч од 6. коло на Суперлигата. Избраниците на Борис Ројевиќ одиграа сигурен натпревар, ја презедоа контролата во завршницата на првото полувреме и ја задржаа предноста до последниот звук на сирената.
Дуелот меѓу двата освојувачи на Европскиот куп на ЕХФ започна во силно темпо, со цврсти одбрани и многу физичка игра. По десет минути на семафорот стоеше 3:3, а прв посериозен чекор направи гостинскиот состав, кој поведе со 4:7. Сепак, Охрид брзо одговори, а проблемите на Алкалоид со исклучувањата му овозможија на домашниот тим да се врати во резултатска рамнотежа.
По израмнувањето на 7:7, охриѓани постепено ја презедоа иницијативата. Гостите направија неколку грешки во нападот, што домаќините го искористија за да изградат предност. Охрид во последните минути пред паузата беше поефикасен и на одмор замина со водство од 15:11.
Во продолжението домашниот тим не му дозволи на противникот да се врати целосно во игра. Со дисциплиниран пристап во одбраната и подобра реализација, Охрид ја зголеми разликата и стигна до највисоки шест гола предност. Алкалоид се обиде да ја направи завршницата понеизвесна и во еден момент ја намали негативата, но немаше доволно време и сили за целосен пресврт.
Голем придонес во победата на Охрид имаше голманот Дино Славиќ, кој забележа десет одбрани, додека Доминик Мате беше најрасположен во нападот со шест погодоци. Кај Алкалоид, Никола Костески исто така постигна шест гола, а Дамјан Митев го заврши мечот со пет.
Со овој триумф Охрид се врати на победничкиот пат по поразот од Вардар и го запиша првиот дерби-триумф во сезоната, откако претходно ремизираше со Еурофарм Пелистер. За Алкалоид, пак, ова е прв пораз по одличниот старт со пет победи.
