Еурофарм Пелистер ја продолжи победничката серија во домашниот шампионат, откако во Битола го надигра Куманово со 36-23 во првиот натпревар од шестото коло на ракометната Суперлига.
Гостите парираа само во почетните минути, кога резултатот беше изедначен на 4-4. Потоа битолчани го презедоа иницијативата, ја зацврстија одбраната и почнаа да ја зголемуваат разликата. Во завршницата од првиот дел предноста на домашниот состав порасна, па на пауза замина со убедливи 18-11.
По одморот избраниците на Лино Червар продолжија во ист ритам. Еурофарм Пелистер брзо стигна до двоцифрена предност и целосно го контролираше натпреварот. Во финишот разликата достигна и 14 гола, а домаќините рутински го приведеа мечот до крај за конечни 36-23.
Филип Кузмановски со седум гола беше најдобар стрелец кај победничкиот тим, додека Петар Атанасијевиќ постигна шест, а Рудолф Хагбарт реализираше пет од пет обиди. Кај Куманово, Наум Костов се истакна со осум погодоци.
Со оваа победа Еурофарм Пелистер стигна до 11 бода од шест натпревари и привремено се искачи на врвот на табелата. Вардар и тимот од Автокоманда имаат по 10 бода, но со натпревар помалку. Куманово, пак, останува на еден освоен бод и сè уште ја бара првата победа сезонава.
