Беласица и Пелистер одиграа без голови (0:0) во Струмица во натпреварот со кој беше заокружено 7. коло во Втората македонска фудбалска лига. Иако двата тима имаа свои можности за погодок, ниту еден не успеа да ја искористи шансата за три бода.
За Беласица ова е петти натпревар по ред без победа, при што струмичани во овој период забележаа пет ремија. Домашниот состав повторно не успеа да стигне до посакуваниот триумф, па мораше да се задоволи со еден бод пред своите навивачи.
Пелистер, пак, ја прекина победничката серија и пропушти можност да освои нови три бода во трката за врвот. Битолчани сега имаат 15 бодови и се наоѓаат на второто место, со еден бод помалку од лидерот Охрид.
Беласица по ова реми има 11 бодови и се наоѓа на петтата позиција на табелата.
Сепак, табеларниот поредок сè уште не е конечен. Дополнително треба да се одигра одложениот натпревар од петтото коло меѓу Работнички и Брера, по кој ќе биде познат и конечниот изглед на табелата.
