На 26 август 1977 година е испишана првата страница од приказната која денес трае веќе 49 години. Приказната за РК Младост 1977 Богданци – клуб кој одамна е многу повеќе од спортски колектив и кој низ децении стана еден од симболите на Богданци и македонскиот ракомет.
Името Младост не е случајно. Клубот го добил името по младината – по младите деца од Богданци кои спортувале и за кои ракометот бил место каде што ги правеле првите спортски чекори. Токму тие генерации ја поставиле основата на една традиција која денес ја продолжуваат нови деца и млади ракометари.
Низ својата историја, Младост поминал низ многу победи, порази, подеми и падови, но и низ исклучително тешки периоди. Имало моменти кога клубот бил пред целосно згаснување, но Младост секогаш успевал повторно да се издигне и да продолжи да живее.
Една од најсветлите страници во историјата се периодите кога богданчани редовно го претставуваа клубот и градот и на европската сцена. Настапите во Европа беа потврда дека од една мала средина може да произлезе клуб со голема ракометна традиција и амбиција.
А денес, 49 години подоцна, Младост повторно го враќа стариот сјај на ракометот во Богданци.
По минатогодишниот успех и пласманот во Суперлигата преку бараж, богданчани повторно се дел од највисокиот ранг на македонскиот ракомет. Со враќањето во елитата се врати и онаа препознатлива ракометна енергија во градот – полните трибини, поддршката од публиката и чувството дека Младост повторно е таму каде што му припаѓа.
Но, приказната не е само за сениорскиот тим. Таа продолжува преку младинските категории, каде што новите генерации го облекуваат сино-белиот дрес и ги прават своите први чекори во спортот.
Токму во тоа е и суштината на Младост – да создава млади ракометари, да им даде шанса, да ги воспитува преку спортот и да ја пренесува традицијата од една на друга генерација.
Од 1977 година до денес, клубот преживеал безброј предизвици. Секогаш кога изгледало дека е на најтешката точка, Младост наоѓал сила повторно да се крене и секогаш имал полна трибина поддршка, на секој меч – доказ дека Богданци живее за ракометот.
