Македонскиот футсал шампион Проект со пораз ја започна европската авантура во претквалификациите за Лигата на шампионите, откако во „Bluebox Arena“ беше совладан од домаќинот Атлетик Клуб Грац со 6:0.
Резултатот, сепак, не ја отсликува целосно сликата од натпреварот, особено ако се земат предвид случувањата на теренот и низа судиски одлуки кои предизвикаа реакции од македонскиот табор и публиката во салата, а на голема штета на Проект.
- Сериозни реакции на судењето
Прв судија на натпреварот беше Срѓан Михајловиќ од Србија, а токму неговото делење на правдата предизвика големо незадоволство кај македонскиот шампион.
Од таборот на Проект имаат сериозни забелешки за повеќе судиски одлуки во текот на натпреварот, а особено реакција предизвика црвениот картон за Димитриев во 29. минута.
Жоао Педро Перејра Синвал од Португалија беше втор судија, а трет судија беше Лаурентиу Илие.
И публиката во салата реагираше на дел од одлуките на судијата, а атмосферата дополнително се вжешти во моментите кога Проект се обидуваше да остане во натпреварот и наметна темпо.
Проект е македонски концепт кој вечерва покажа дека може да се носи со шампионот на Австрија, но во одредени моменти не успеа да се носи и со околностите на теренот.
- Грац ја искористи својата шанса
Австрискиот шампион, сепак, беше исклучително ефикасен и ги искористи своите можности.
Буковец постигна дури три гола – во 20-тата секунда, 18:59 и 30:09 минута, Јуриќ погоди во 31:13, додека Ковачиќ двапати се запиша во листата на стрелци – во 34:17 и 35:34 минута.
Проект имаше 27 удари кон голот, наспроти 40 на Грац, а македонскиот шампион изведе и шест корнери.
На голот на Проект беше Антонио Петровски, кој со своите интервенции собра доста аплаузи од публиката.
- Нема време за разочарување – утре е нов ден
По вечерашниот пораз, Проект веднаш мора да го насочи фокусот кон следниот натпревар.
Македонскиот шампион утре од 17:30 часот ќе се соочи со шампионот на Словенија, Врхника, во вториот натпревар од групата А.
🇲🇰 Проект – Врхника 🇸🇮
📅 27 август
🕠 17:30 часот
Европската приказна не завршува со првиот натпревар. Проект има уште два натпревари пред себе и можност да покаже што навистина може на европската сцена.
