Прилепска Победа забележа уште еден висок триумф откако во рамките на 8. коло на Трета лига регион 2 пред домашната публика го декласираше Ултрас со резултат од 5:1.
Марио Наумоски беше двоен стрелец, а по еден гол постигнаа Даниел Карчески, Александар Ристовски и Иса Цанески. За гостинот единствениот гол го постигна Славчо Стојчевски.
Стадионот „Гоце Делчев“ беше одново исполнет со публика која даваше силна поддршка за својот миленик.
Росоман на домашен терен дојде до триумф од 3:1 над Млекар. По првите 45 минути резултатот беше 1:0 со гол на Марко Миловановиќ, а во вториот дел се случи израмнување во 56. минута преку голот на Горан Илиоски.
По четиринаесет минути игра Слободан Дуков погоди за ново водство на домашните, а пак Стефан Костовски во 82. минута ги постави конечните 3:1.
Никола Толевски го расплака Борец со два гола во финишот со што велешани мораа да се задоволат само со бод. Првиот дел донесе чисти мрежи, на стартот од вториот дел Марио Наумовски погоди за 0:1, а во 79. минута Џемал Ибрахимовиќ донесе двојна предност за Борец.
Само за три минути се случи намалување на предност со голот на Никола Толевски, а во 91. минута истиот играч постигна уште еден гол и го остави Борец без победа пред самиот судиски свиреж.
Колото се затвара утре со останатите мечеви.
