ГРК Охрид по вторпат во низа го освои меморијалниот турнир „Крсте Андоновски“, откако во финалето го совлада Вардар со 29-27 и го одбрани трофејот освоен минатата година. Пред околу 2.000 гледачи во „Билјанини Извори“, „гладијаторите“ одиграа уште еден успешен и возбудлив натпревар и го заокружија турнирот без пораз.
Тренерот на охриѓани, Борис Ројевиќ, во изјава за Спортска Мрежа, им честиташе на своите ракометари за пристапот и енергијата во финалето, а посебна благодарност упати до публиката за огромната поддршка. Сепак, тој предупреди дека Вардар ќе биде далеку посилен кога ќе настапи во комплетен состав во Суперкупот, додека Охрид во наредниот период го очекува густ распоред и долги патувања.
„Им честитам на моите момци за добрата енергија, за залагањето, за сè. Благодарам и на оваа публика денес, 2000 луѓе на пријателски натпревар- навистина фантастично. Прерано го отпишавме Вардар, кој има страшен тим кога ќе се комплетира за Суперкупот, но ќе видиме за десетина дена.. две недели. Она што ме загрижува е недостатокот од тренинзи, а сега имаме и далечни патувања- за Будва, за Панчево, а потоа и за Гевгелија, но да се собереме малку, да се обидеме можеби повеќе да се ресетираме и одмориме отколку што можеме нешто да работиме, па да одиме во нови победи.“- изјави стратегот на Охрид за Спортска Мрежа.
Охрид сега го очекува период исполнет со патувања и натпревари, а следниот голем предизвик ќе биде Суперкупот против Вардар во Гевгелија.
