Еурофарм Пелистер 2 запиша убедлив триумф над Бутел Скопје со 37-30 во натпревар од меморијалниот турнир „Миле Нешкоски“, кој се одржува во Прилеп.
Битолчани уште од самиот почеток го презедоа контролата врз натпреварот, а добрата игра во првото полувреме им донесе предност од пет гола на паузата, 22-17. Во продолжението избраниците на Еурофарм Пелистер 2 искусно ја одржуваа предноста и без поголеми проблеми го приведоа дуелот до крај за конечни 37-30.
Најефикасен во победничкиот состав беше Кристијан Симоновски со седум погодоци, додека Давид Димески постигна шест, а Лука Георгиевски додаде четири гола.
Кај Бутел Скопје, најдобар стрелец беше Давид Јаневски со шест гола, додека Лука Јовиќ и Архангел Трсунов постигнаа по пет погодоци, но нивниот учинок не беше доволен за Бутел да направи пресврт.
Со овој триумф, Еурофарм Пелистер 2 обезбеди натпревар за третото место на турнирот, додека Бутел Скопје ќе разигрува за петтата позиција на меморијалниот турнир „Миле Нешкоски“.
