Меморијалниот ракометен турнир „Миле Нешкоски“ во Прилеп започна во драматичен стил, со натпревар кој понуди неизвесност до самиот крај. Во салата „Ристе Ристески – Ричко“, ГРК Тиквеш од Кавадарци со 23:22 го совлада РК Бутел Скопје.
- ЦЕЛИОТ НАТПРЕВАР: БУТЕЛ – ТИКВЕШ
Скопскиот состав имаше одлично прво полувреме и на паузата замина со 15:11, но Тиквеш во продолжението одигра далеку подобро и чекор по чекор ја анулираше негативата.
Најголем придонес во пресвртот имаше Бен Мохамед Азис, кој со 7 погодоци беше прв стрелец на Тиквеш и на натпреварот. Коцев Димитар и Ончев Тоше постигнаа по пет гола.
Кај Бутел, најефикасен беше Дејан Михајловиќ со пет погодоци, додека Лука Јовиќ и Тео Тодески додадоа по четири, но тоа не беше доволно за позитивен резултат.
Во завршницата се играше гол за гол, а Тиквеш успеа да го задржи водството и да слави со минимални 23:22.
Турнирот продолжува со нов интересен натпревар – следува пресметката меѓу домаќинот РК Прилеп 2010 и РК Мулти Есенс.
