По повод Детската недела, ФК АП Брера Струмица и ЖФК Тиверија Брера организираа прекрасен спортски настан посветен на најмладите, на кој учествуваа околу 100 дечиња од градинките „Виножито“ и „Детска радост“.
Децата имаа можност преку игра, дружење и забава да ја почувствуваат убавината на спортот, а организаторите уште еднаш ја потврдија својата определба за создавање здрави навики и активна младина уште од најрана возраст.
„Како спортски клубови чувствуваме одговорност да придонесеме во создавањето здрава, активна и среќна младина. Веруваме дека љубовта кон спортот и здравите навики се градат уште од најмала возраст, а токму ваквите дружби се најубавиот начин децата да го почувствуваат спортот преку игра, насмевки и забава“, посочија од двата клуба.
Исто така, клубовите упатија голема благодарност до градинките „Виножито“ и „Детска радост“, до воспитувачките и до сите кои помогнаа настанот да помине во позитивна и весела атмосфера.
Посебна радост за организаторите бил и подарокот кој најмладите го подготвиле за нив.
„А посебно им благодариме на нашите мали другарчиња за прекрасниот подарок што го подготвија за нас! Тој ќе ни остане како убав спомен од ден исполнет со детски насмевки, радост и љубов кон спортот.“
Во реализацијата на настанот свој придонес дадоа и Мартини Болница, кои обезбедија вода и овошје за сите дечиња.
За медиумското покривање на оваа детска спортска дружба, благодарност клубот упати и до Спортска Мрежа.
Брера продолжува да ја гради љубовта кон спортот од најмала возраст – со игра, дружење, насмевки и позитивни вредности.
