КК Пелистер продолжува да инвестира во својата иднина, со јасна определба покрај резултатите на сениорско ниво да посвети големо внимание и на развојот на младинските категории.
Од битолскиот клуб истакнуваат дека примарна цел и оваа сезона е успешен настап во Првата лига и продолжување на традицијата на добри резултати. Паралелно со тоа, раководството останува посветено на создавање и афирмација на млади кошаркари кои во иднина треба да бидат носители на играта.
Како потврда на таа стратегија, Пелистер ги продолжи договорите со двајцата свои перспективни кошаркари, Наум Марковски и Лео Созовски. За двајцата таленти ова ќе биде трета сезона во која ќе бидат дел од сениорскиот тим, со можност дополнително да се развиваат и да стекнуваат драгоцено искуство во прволигашката конкуренција.
Со овој потег, битолскиот клуб уште еднаш покажува дека покрај амбициите за резултатски успеси, сериозно работи и на градењето на стабилна иднина преку развојот на сопствените млади кошаркари.
