Најдобрата македонска тенисерка Лина Ѓорческа со пресврт и по голема борба избори пласман во второто коло на турнирот во Германија, откако ја совлада Украинката Анастасија Фирман со 2-1 во сетови (6:4, 4:6, 6:4). Мечот траеше два часа и 30 минути.
Во првиот сет двете тенисерки имаа потешкотии на свој сервис, па беа направени дури седум брејка, од кои четири на Ѓорческа. Клучен беше седмиот гем, во кој беа одиграни 14 поени, а македонската тенисерка успеа да го освои и да ја задржи предноста за водство од 1-0 во сетови.
Во вториот сет Фирман беше поуспешна, направи еден брејк повеќе и со 6:4 го израмни резултатот на 1-1.
Решавачкиот сет донесе голема неизвесност. Во првите пет гема немаше брејк, а потоа Ѓорческа поведе со 4:2. Украинката успеа да врати еден брејк во деветтиот гем, но Лина веднаш возврати, направи нов брејк и со 6:4 го доби третиот сет, а со тоа и мечот.
Во второто коло Ѓорческа ќе се соочи со Алена Ковачкова од Чешка, која во два сета (2-0) беше подобра од Сохун Парк.
Турнирот во Германија се игра за награден фонд од 60.000 американски долари.
