Македонскиот футсал шампион Проект и голманот Филип Лазаров и официјално ја завршија меѓусебната соработка, со што 22-годишниот чувар на мрежата станува слободен во изборот на новата средина.
Лазаров зад себе остава успешна сезона во дресот на клубот од Јосифово, со кој ја освои двојната круна во македонскиот футсал, триумфирајќи и во шампионатот и во Купот на Македонија. Во Проект пристигна во февруари 2025 година и беше дел од генерацијата која испиша значајни страници во клупската историја.
Роден на 4 јануари 2004 година, Лазаров важи за еден од најперспективните млади голмани. Покрај настапите за Проект, во футсал кариерата го бранеше голот и на Црна Река од Кавадарци.
Покрај футсалот, Лазаров има богато искуство и на големиот фудбалски терен. Кариерата ја започна во Брера Струмица, а потоа беше дел од Беласица, Тиверија, Хоризонт Турново и Ударник од Пирава, каде минатата сезона настапуваше како голман на овој третолигаш.
Станува збор за млад и талентиран голман со голем потенцијал, а интерес за неговите услуги веќе постои. Се очекува во наредниот период да биде познато каде Лазаров ќе ја продолжи својата кариера и дали повторно ќе остане во македонскиот футсал или ќе прифати нов предизвик.
