Овој викенд во Хрватска на патеката во Бузет ќе се вози последната трка од ФИА Европскиот шампионат на ридски патеки (EHC) за 2025 година, на која македонскиот ас Игор Стефановски – Иџе ќе настапи со својот „Ферари 488 B8“, специјално подготвен за ваков тип патеки. За трката се пријавени рекордни 241 возачи.
Годинава, на шампионатот во генералниот пласман, Иџе се наоѓа на втората позиција, но тој веќе е носител на европската титула во ова натпреварување, во група 1.
Кариерата ја започна во 2001 година на патеките во Скопје, а повеќе од две децении подоцна зад себе има богато искуство со титули и победи. Од досегашните 199 трки, успеа да оствари 83 победи и 122 пати да се најде на подиум, што го вбројува меѓу најуспешните европски возачи на ридски патеки.
Верниот поддржувач, „Видеолотарија Касинос Австрија“, и понатаму останува на страната на Стефановски, најавувајќи продолжување на соработката и заедничка поддршка за Иџе и за Македонија.
