На вчерашната седница на Управниот одбор на ФФМ беа донесени повеќе значајни одлуки. Една од најважните се однесува на цените на билетите за претстојниот квалификациски натпревар за Светското првенство 2026 меѓу Македонија и Казахстан, кој ќе се одигра на 13 октомври на Националната арена „Тодор Проески“ во Скопје.
Цената за западната трибина е утврдена на 300 денари, билетите за јужната и северната трибина изнесуваат 400 денари, додека влезниците од прва категорија чинат 500 денари. ФФМ исто така ќе им овозможи бесплатен влез на источната трибина за младите фудбалери од Детската лига, регионалните школи и младинските категории придружувани од своите тренери.
Одборот ги утврди и цените на билетите за натпреварот на репрезентацијата до 21 година против Ерменија во квалификациите за Европското првенство 2027. Натпреварот ќе се игра на 10 октомври во Битола, а влезницата ќе чини 200 денари.
Покрај тоа, беа усвоени и новите пропозиции за натпреварување во Детскиот фудбал за сезоната 2025/26. Управниот одбор ја донесе и одлуката за распределба на средствата од солидарната шема на УЕФА за клубовите од Првата женска фудбалска лига. Осум екипи, меѓу кои ЖФК Скопје 2014, ЖФК СС Истатов 2015, ЖФК АСС Јунајтед, ЖФК Тиверија Брера, ЖФК Речица, ЖФК Топ Гол, ЖФК Атлетико и ЖФК Каменица Саса ќе добијат по 10.500 евра.
На седницата беше отворена и темата за изградбата на западната трибина на Градскиот стадион во Штип. Минатата недела таму престојуваше инспекција од УЕФА, а по приемот на официјалниот извештај ќе бидат преземени понатамошни чекори за завршување на работите.
