Претседателот на Одбојкарската федерација на Македонија, Петар Јовановски, и генералниот секретар Филип Деспотовски ќе учествуваат на 40. Конгрес на Светската одбојкарска федерација (ФИВБ), кој ќе се одржи од 20 до 22 ноември во Пунта Кана, Доминиканска Република.
Македонската делегација ќе биде дел од големиот собир на светското одбојкарско семејство, на кој е најавено присуство на 222 претставници од националните федерации од целиот свет.
Во фокусот на Конгресот ќе биде стратешкиот развој на одбојката и плановите за нејзино понатамошно глобално ширење, со амбициозна цел спортот да стане „поголем и подобар“. ФИВБ има за цел бројот на луѓе кои се вклучени во одбојката на глобално ниво, од актуелните 800 милиони, до 2032 година да достигне 1,6 милијарди.
Учеството на Конгресот ќе биде и можност за Јовановски и Деспотовски за продлабочување на соработката со европските партнери, но и за воспоставување нови контакти и врски со претставници од одбојкарските федерации надвор од европскиот континент.