Денес КК Пелистер ќе го игра своето историско европско деби. Битолската екипа ќе настапи на првиот официјален европски натпревар во својата историја, учествувајќи на еден од трите квалификациски турнири за Лигата на Шампионите на ФИБА. Натпреварот против италијанскиот тим Реџо Емилија започнува во 15:30 часот во Самоков.
Иако Италијанците се фаворити, Пелистерци се решени да излезат на терен и да остават трага во историјата. Доколку загубат, Битолчани ќе продолжат да се натпреваруваат во групната фаза на ФИБА Купот, каде ќе се сретнат со Цедевита јуниор од Хрватска, Патриоти Левице од Словачка и Керавнос од Кипар.
Во тимот ќе недостасуваат двајца играчи – Џордан Скипер Браун, кој го напушти клубот поради семејни причини, и Ленгстон Вилсон, чие сертифицирање е задоцнето.
„Реџо Емилија е тим со голем квалитет, предводен од грчкиот стратег Пифтис. Нивните странски играчи се искусни и играат на високо ниво со години, но за нас е голема чест и задоволство што можеме да се сретнеме со таков ривал. Ќе дадеме се од себе за достојно да го претставиме нашиот клуб и македонската кошарка. Ова е тренд што треба да го следат и другите клубови – преку европските натпревари се добива искуство и квалитет“, изјави тренерот Боро Даскаловски.
