Тиверија Брера со три бода се враќа во Струмица, откако во Кравари со 0:2 славеше над Пелистер во мечот од 10. коло на Првата женска фудбалска лига.
Херој за тимот на Славе Велков беше Теона Галабовска која ги постигна двата гола. Најпрво бисерот на Тиверија Брера резултатот го отвори во 5. минута, а во 80. минута ја потврди победата.
Вардар со голот на Настасја Накова во 35. минута славеше минимална победа од 0:1 над Истатов. Со новите три бода „вардарки“ продолжуваа да се искачуваат на табелата.
Љуботен го доби дербито во Македонска Каменица откако славеше над Каменица Саса со 1:2, соочување на два поранешни шампиони.
Калина Попески погоди во 41. минута за водство на тетовскиот им од 0:1 на полувреме. Во вториот дел брзо падна гол, откако Елена Симјанова во 52. минута беше прецизна за 0:2.
„Рударките“ преку голот на капитенот Ана Димитровска во 66. минута намалија на 1:2, но до крајот немаа сили за нешто повеќе и го претрпеа вториот пораз во низа за вкупно четврти сезонски неуспех, а пак Љуботен останува на врвот.
Ас Јунајтед конечно ја прекина серијата порази откако на домашен терен со 3:0 славеше над Речица. Веса Села по три минути го отвори резултатот, а Марија Јулчовска во 19. минута постигна гол за 2:0 на полувреме.
Во вториот дел од средбата во Струга, Сара Дика во 71. минута ги постави конечните 3:0.
Колото беше отворено изминатата средба, кога шампионот Скопје го „прегази“ Кочани, а извештајот од тој меч можете да го прочитате овде.
