Македонската машка сениорска репрезентација на одличен начин ја започна втората рунда од претквалификациите за Евробаскетот 2029 година, откако на гостински терен во Виена убедливо ја совлада Австрија со 91:59.
Еден од најважните адути во составот на селекторот Хозе Марија Берокал, Мозес Рајт, по натпреварот не го криеше задоволството од убедливиот триумф, но и од атмосферата која владее во националниот тим. Американецот истакна дека победата е резултат на одличната тимска игра и заедничкиот пристап на сите кошаркари.
„Секогаш е убаво да се победи. Имавме и доста загубени топки, можам да набројам уште неколку работи кои треба да ги поправиме, но генерално сум задоволен бидејќи ја завршивме работата за која дојдовме овде.
Среќен сум и поради атмосферата во екипата. Одигравме добар натпревар и заслужено победивме“, истакна Рајт.
Македонскиот репрезентативец веќе гледа кон следниот предизвик кој го очекува националниот тим. Во ноемврискиот ФИБА-прозорец, Македонија ќе го пречека Кипар во Скопје.
„Ни претстои натпревар против Кипар во Скопје во ноември. Можеби ќе биде тежок натпревар на физички план, но подготвени сме за тоа, бидејќи знаеме како да играме. Јас лично сум одиграл голем број натпревари од таков тип.
Очекувам да бидам дел од репрезентацијата и на тој натпревар“, порача Мозес Рајт.
Убедливата победа во Виена претставува одличен почеток за Македонија во новиот претквалификациски циклус, а следниот предизвик за избраниците на Берокал ќе биде ноемврискиот дуел со Кипар на домашен терен.
