Нашиот најдобар автомобилист на ридски патеки, Игор Стефановски – Иџе, викендов се искачи на подиумот во Словенија, освојувајќи го одличното трето место во генералниот пласман, во конкуренција на 242 автомобилисти од цела Европа.
За Стефановски ова беше особено значаен резултат бидејќи за првпат се натпреваруваше со својот нов автомобил „Nova Proto NPO1“. Деби настапот со новиот прототип беше крунисан со место на подиумот, што претставува уште еден голем успех во неговата богата кариера.
„Трето место во генералниот пласман во Словенија, во конкуренција на 242 автомобилисти од цела Европа, на моето деби со новиот прототип. Ова е нешто што ѝ дава дополнителна тежина на целата моја кариера“, порача Иџе по одличниот настап.
Со овој резултат, Иџе уште еднаш покажа дека е во самиот врв на европскиот автомобилизам на ридски патеки. Одличното деби со новиот прототип носи дополнителен оптимизам пред продолжението на сезоната. Стефановски продолжува со амбиции за нови подиуми и уште подобри резултати на следните трки.
