Охрид утре ќе го одигра третиот натпревар во рамки Регионалната лига, а гостувањето кај Динамо Панчево воедно ќе биде и последниот тест за „гладијаторите“ пред почетокот на новата сезона во македонското првенство. По двете победи на стартот, охриѓани ќе атакуваат на максимален учинок.
Едно од новите засилувања за Охрид во новата сезона, Филип Талески очекува сериозен натпревар на гостински терен, но верува дека Охрид има квалитет да дојде до уште еден триумф. За новото засилување на охриѓани, приоритет е тимот да одигра максимално ангажирано и подготовките да ги заврши без пораз.
„Нè очекува еден гостински натпревар против квалитетна екипа. Одиме во Панчево да дадеме максимум и да победиме. Сакаме да го завршиме подготвителниот период со сите победи пред почетокот на сезоната во македонското првенство.“- изјави Талески.
Охрид досега беше подобар од Војводина и Будванска Ривиера, па со две победи ќе влезе во овој дуел со самодоверба. Натпреварот против Динамо Панчево ќе биде последната проверка на формата пред официјалните обврски во домашното првенство.
„Гладијаторите“ ќе се обидат со уште една победа да стават точка на успешниот подготвителен период и со максимален ефект да го дочекаат почетокот на сезоната.
Натпреварот меѓу Динамо Панчево и Охрид ќе се одигра утре од 18:00 часот во салата „Стрелиште“ во Панчево.
