Подобрени услови за тренинг и развој на младите фудбалери во Струмица. Помошните фудбалски терени добија ново осветлување со поставување на 16 рефлектори, со што значително се подобруваат условите за работа и тренинг на младинските категории.
На овие терени секојдневно тренираат голем број млади фудбалери од „Беласица“, „Брера Струмица“ и „Тиверија Брера“. Новото осветлување ќе овозможи подобра организација на тренинзите, како и поголема искористеност на спортските капацитети во вечерните термини.
Проектот е реализиран во соработка со Фудбалската федерација на Македонија, а на настанот присуствуваа градоначалникот на Струмица, Петар Јанков, и генералниот секретар на ФФМ, Леонид Јандреоски.
Со поставувањето на новото осветлување се потврдува заедничката заложба за унапредување на спортската инфраструктура и создавање подобри услови за развој на младите фудбалери во Струмица.
