Машката одбојкарска репрезентација на Македонија до 20 години вчера во Крушево ги започна подготовките за настапот во Зонските квалификации за Европското првенство 2027.
За оваа генерација одбојкари квалификациите ќе бидат прво учество во борбата за пласман на едно континентално првенство, откако минатата година настапи на Европските младински олимписки игри.
Селекторот Јован Шапе во наредните дваесет дена ќе работи со сите повикани репрезентативци. Подготовките ќе се реализираат во Крушево, каде што селекцијата ќе остане до заминувањето за Софија. Зонските квалификации ќе се одржат од 25 до 29 август во главниот град на Бугарија.
„Верувам во Вас, затоа сте селектирани и сте тука. Не чека напорна работа“ – ги поздрави младите одбојкари селекторот Шапе и продолжи: „Верувам дека ќе бидете совесни, одговорни и дисциплинирани, и ќе ја искористите шансата која ја имате затоа што вие сте иднината на македонската одбојка. Првпат една млада репрезентација има можност да игра едни европски квалификации и без разлика на противниците се надевам дека ќе се покажеме во добро светло.“ – вели селекторот.
Машката репрезентација до 20 години ќе има силна конкуренција во Зонските квалификации каде за противници ќе ги има Русија, Белорусија, Србија, Турција и Бугарија. Момците ќе играат по системот „секој со секого“, а бројот на екипи кои ќе се пласираат во следната рунда од квалификациите ќе зависи од бројот на пријавени екипи во другите пет Зонски квалификации.
