Женската јуниорска репрезентација на Македонија го забележа четвртиот пораз на Европското првенство од Дивизијата „Б“ за кошаркарки до 18 години, кое се одржува во романскиот град Тулчеа. Во последниот натпревар од групната фаза, македонските кошаркарки беа поразени од селекцијата на Словачка со 80:65.
И покрај конечниот пораз, избраничките на селекторот Виктор Петровски го прикажаа своето најдобро издание во првото полувреме на шампионатот. По израмнетата прва четвртина, која Македонија ја доби со 22:21, нашата селекција продолжи со сигурна игра и во вториот период.
Во неколку наврати Македонија имаше предност од четири поени, а на полувремето замина со минимално водство од 44:43.
Во продолжението Словачка успеа да го наметне своето темпо и со подобра игра направи резултатски пресврт. По три четвртини водеше со 62:54, а во последните десет минути ја задржа предноста и стигна до победа од 80:65.
Најефикасна во македонскиот состав беше Колева со 22 поени, четири скока и три асистенции. Трајковска натпреварот го заврши со 16 поени, три скока и две асистенции, додека Милосављевиќ запиша 10 поени, шест скока и две асистенции.
Со завршувањето на групната фаза, Македонија го освои петтото место во својата група. По слободниот ден, нашите јуниорки ќе ги продолжат настапите во разигрувањето за пласман од 17. до 20. место на Европското првенство во Тулчеа.
