Машката сениорска одбојкарска репрезентација на Македонија денеска во хотелот „Монтана“ во Крушево ги започна подготовките за настапот на Европското првенство – ЕвроВолеј 2026.
На првата прозивка кај селекторот Јошко Миленкоски се јавија сите повикани репрезентативци, со исклучок на средниот блокер Филип Савовски, кој се очекува да се приклучи денес.
На воведниот состанок, Миленкоски направи осврт на подготовките за ЕвроВолеј 2023, презентирајќи статистички податоци и анализи од претходниот циклус. Притоа, тој нагласи дека од репрезентативците ќе бара максимална сериозност, дисциплина и професионален однос, најавувајќи интензивен и напорен ритам на работа во текот на подготовките.
Репрезентацијата во Крушево ја поздравија и потпретседателот на Федерацијата, Ивица Хаџи Иљоски и генералниот секретар Филип Деспотовски.
„Добредојдовте и Ви благодарам што го прифативте повикот. Посебно задоволство ми е што екипата е во истиот состав како претходно, што Миленкоски, како наш најтрофеен стратег ќе не предводи на уште едно Европско првенство и што ја задржавме компактноста. Реални сме, не гаиме илузии и свесни сме за силината на противниците со кои ќе се соочиме на ЕП, но искрено се надевам на успех и верувам дека доколку ни се прижи шанса за пласман во втората фаза ќе ја искористиме. Екипата има искуство и добро знае што значи да се игра на ЕП и поради тоа не се сомневам дека секој од вас ќе даде максимум. Ви посакувам успешни подготовки и сите здрави да го дочекате почетокот на ЕП“ – истакна потпретседателот Хаџи Иљоски.
Репрезентацијата според распоредот на 7 септември наутро патува за Софија, додека два дена подоцна против домаќинот и еден од организаторите Бугарија го отвора настапот на ЕвроВолеј 2026.
