Фудбалската репрезентација на Македонија продолжува без победа и без постигнат гол во новото издание на Лигата на нации. „Црвено-жолтите“ на Националната арена „Тодор Проески“ претрпеа пораз од Шкотска со 0-2, што беше трет неуспех за нашата селекција во групата.
Гостите одлично го започнаа натпреварот и уште во шестата минута стигнаа до предност. Киран Боуви доби простор пред нашиот шеснаесетник, се реши за удар од далечина и прецизно ја смести топката во мрежата на Димитриевски за 0-1.
Македонија тешко доаѓаше до шанса, додека Шкотска беше поконкретна и во продолжението од првиот дел. Робертсон и Ганон-Доук имаа можности за зголемување на предноста, но не беа прецизни, додека најсериозниот наш обид го имаше Илиевски, кој по една контра шутираше крај голот.
Селекторот Гоце Седлоски реагираше уште во првото полувреме и по само половина час направи двојна замена, внесувајќи ги Џеков и Атанасов на местата на Херера и Станковски. Сепак, промените не донесоа значителен пресврт во играта.
Во вториот дел Шкотите повторно беа поопасни, а главна улога имаа и ВАР-ситуациите. Во 56. минута беше досуден пенал за гостите по стартот на Гаштаров, но по прегледот на снимката одлуката беше преиначена.
Неколку минути подоцна повторно следуваше проверка за пенал, но овојпат одлуката остана. Миовски играше со рака во сопствениот шеснаесетник, а МекГин ја презеде одговорноста и во 69. минута погоди за 0-2.
Шкотска остана со десетмина во 83. минута по исклучувањето на Мекена, но Македонија не успеа да го искористи бројчаниот вишок. До крајот немаше промена на резултатот.
Со тоа, Македонија го запиша третиот пораз во групата и повторно остана без постигнат гол. Во следниот натпревар нашата репрезентација гостува кај Швајцарија во Луцерн.
