Ракометниот клуб Илинден продолжува со формирањето на стручниот штаб во пресрет на новата сезона, во која клубот за првпат ќе настапува во Првата ракометна лига на Македонија. Ново име во редовите на дебитантот е поранешниот македонски репрезентативец Дејан Пецаковски, кој ќе ја извршува функцијата помошник тренер.
Пецаковски зад себе има богата и успешна играчка кариера, настапувајќи за неколку од најреномираните македонски клубови, меѓу кои Пелистер, Металург, Вардар, Зомимак, Еурофарм Работник и Пролет, а интернационално искуство стекна и во тунискиот клуб Африкан.
На репрезентативен план, тој беше капитен на младинската репрезентација на Македонија која настапи на Светското првенство во 2007 година, додека подоцна беше дел и од сениорската репрезентација на Европското првенство во Данска во 2014 година.
По завршувањето на својата играчка кариера, Пецаковски се посвети на тренерската работа, со цел стекнатото искуство, знаење, дисциплина и победнички менталитет да го пренесе на младите ракометари.
Со ангажманот на Дејан Пецаковски, РК Илинден добива значително засилување во стручниот штаб во пресрет на историската сезона, во која клубот ќе дебитира во Првата ракометна лига на Македонија, со амбиција да остави позитивен впечаток и да изгради конкурентен тим.
