Македонскиот шампион Еурофарм Пелистер официјално потврди дека завршува соработката со младиот босански ракометар Алем Хаџиќ, откако двете страни постигнаа договор за спогодбен раскин на договорот.
Талентираниот централен бек во Битола пристигна во август 2023 година од босанскиот Коњух, како еден од најперспективните млади ракометари во регионот. Во изминатите три сезони остави силен впечаток, пред сè во младинските категории, но доби шанса и во сениорскиот тим на „зелено-белите“.
Хаџиќ беше еден од предводниците на младинскиот состав на Еурофарм Пелистер кој испиша историја со пласманот на завршниот турнир во младинската Лига на шампионите, каде што се истакна како најдобар стрелец на натпреварувањето.
Неговиот талент брзо беше препознаен и во сениорскиот состав, па на само 17 години дебитираше во Лигата на шампионите, каде што успеа да се запише и меѓу стрелците. Во дресот на битолскиот клуб беше дел и од генерацијата која ги освои трите последователни шампионски титули на Македонија во периодот од 2023 до 2025 година.
Од Еурофарм Пелистер му се заблагодарија на Хаџиќ за придонесот во изминатиот период и му посакаа многу успех во продолжението од неговата ракометна кариера.
